Entamu del cursu na escuela de música tradicional de Reija

Esta escuela entamó nel añu 1995 al dase cuenta dellos componentes del Grupu Reija , que nel entornu de la agrupación y nel ambiente que se movien había una necesidá de transmitir enseñances sobre instrumentos tradicionales y sobre too no relativo a pareyes de gaita y tambor que supieran tocar pa grupos.

La escuela, nel so entamu, daba clas de curdión, gaita y tambor. Llueu añadióse pandereta, panderu cuadrau, baille, llinguaxe musical y cultura tradicional. Les clases impártense nes aules del Colexu Públicu "Eulalia Álvarez Lorenzo" que ta situau na Plaza Merediz de La Felguera, ente la Ilesia y la Biblioteca, mesmamente enfrente l'ambulatoriu. El Fechu de que les clases seyan nes instalaciones d'un colexu favorez que'l escolin tea una atención personalizada al disponer d'un aula pa él solu. Una de les ventaxes de la escuela de música tradicional "Reija" de Llangréu ye que la propia escuela facilita l'instrumentu y el material didácticu. D'esta manera, l'escolín nun tendrá que facer un desembolsu importante de perres hasta que él lo decida, en casu de que siga afondando nel so aprendizaxe. Nun hai edá concreta pa entamar, nin por mozu nin por vieyu. La escuela adaptaráse a les posibilidaes del alumnu. Dempués del aprendizaxe individual del instrumentu, ponse en comuña lo aprendío con otros alumnos na modalidá de conxuntos musicales (pareya, bandina, etc.).

Anguañu cunta col so aula itinerante que permite a la mesma ufiertar el so programa a asociaciones y otres entidaes.

Pa más información pue pasase pol Colexu Eulalia Álvarez Lorenzo de La Felguera los martes o los xueves de ochobre a xunu a partir de les 18 hores o bien llamar a los númberos de teléfonu: 985 67 54 96 - 676 69 14 24 o al corréu elletrónicu info@reija.as

Esti añu entama el cursu de la escuela de música tradicional del Grupu Reija, nel mes d'ochobre. Nesti nuevu cursu ufiertense les asignatures de Tambor tradicional, Curdión Diatónicu, Baille Tradicional, Panderu y Pandereta, Folklore y Tradición y Llinguaxe Musical. Los díes de les clases son los llunes y miercoles pa gaita,tambor y pandereta y los vienres p'acurdión.

Reija na Feria Muestres 2009

Gran parte de la exposición permanente que'l Grupu Reija tien na Casa los Alberti de Ciañu, pue vese nestos díes na Feria Internacional de Muestres d'Asturies.

Esti añu, y hasta que termine la Feria Muestres, dellos paneles, y material en xeneral de la exposición de Ciañu tará a la vista'l publicu nel stand del Conceyu Llangréu que tien nel recintu de la feria. Hasta agora dellos cientos de persones pasaron pol stand del Ayuntamientu de Llangréu, visitando la exposición montada por el Grupu Reija, y el númberu de visitantes, va siguir aumentando hasta'l final de la Feria. La xente que hasta agora vió la exposición, tanto na Casa los Alberti como na Feria Muestres, ta faciendo una valoración perpositiva, tanto del material que ta a la vista como de la so presentación.

La semeya ye cortesía d'Elena Alonso.

Reija nel Beltaine Intercéltico

Cola llegada del branu amontónense les actuaciones y salides, igual que tolos años. Güei mesmo, domingu 12 de xunetu, el Grupu Reija acaba d'actuar en La Mudrera, nel conceyu Llangréu, como ya ye vezu dende fai años. El próximu sábadu 18 a les 19:00 hores el Grupu va actuar nel nuevu Festival Intercelticu d'Avilés nomáu Beltaine Intercéltico.

Tola información sobre esti eventu pue atopase na so web oficial http://www.beltaine.es/ onde pué consultase tola programació y actividaes que van tener llugar (esposiciones, alderiques, un congresu de periodismu y cultura tradicional, etc.).

Exposición na Casa los Alberti de Ciañu

Dende fai dellos díes ya pue ser visitada la exposición d'indumentaría y etnografía asturiana que'l Grupu Reija tien montada na recientemente inauguarada Casa los Alberti de Ciañu.

La Casa los Alberti, también conocía como Casa de los García Bernardo, data del sieglu XVIII. Tien planta rectangular, dos pisos, paredes en piedra y mampostería, cubierta a cuatro agües y escudu na la fachada. El Ayuntamientu de Llangréu iguó esta edificación con destín a un equipamientu cultural p'atender les necesidaes de la zona, y muy específicamente les referíes a Llingua y Cultura Asturiana.

Na planta baxo cubierta, el Grupu Reija, col sofitu del Ayuntamientu Llangréu y Cajastur, entamó una exposición permanente sobre la indumentaria tradicional asturiana a lo llargo la so hestoria y amás, creóse un aula pedagóxica e interactiva sobre les costumes asturianes, especialmente habilitada pa neños y neñes con posibilidá de facer actividaes infantiles y una zona interactiva con paneles informatizaos informativos.

Dende'l Grupu Reija punsimos especial ilusión y procuru en tolo que cinca a esti proyeutu y esperamos que seya d'interés a tola xente que se quiera averar a echar un güeyu. La entrada ye de baldre, esperemos que vos presta la mitá de lo que nos prestó a nós entamalo.

V Mercáu de Tolivia 09

Llega la edición del 2009 del Mercáu de Tolivia los próximos díes 30 y 31 de mayu. Dende'l primer añu que se fizo, el Grupu Reija vien participando activamente al traviés d'actuaciones, amueses y delles collaboraciones cola xente qu'entama esti prestosu mercáu tolos años. La rellación del Grupu Reija cola xente de Tolivia ya vien de dellos años, al entamar un cursu de baille tradicional pa los vecinos del pueblu, el cual foi correspondíu con collaboraciones en delles actuaciones del nuesu grupu. Esti añu, como nun podía ser d'otra forma, el Grupu Reija tamién actuará nel V Mercáu de Tolivia. Equí podeis ver el programa:

SABADU 30 :

16:00 Entamu del mercáu de Tolivia cola presencia'l Alcalde.

17:00 IV alcuentros na caleya. Al rodiu la vestimenta y espocición de traxes y madreñes.

17:30 Baille tradicional asturianu.

18:30 Teatru a cargu del grupu el Ñeru los Coríos.

22:30 piesllu de la xornada cola actuación de los Piroduendes, (espectaculu de fuevu).

DOMINGU 31 :

12:00 entamu del día col son de la gaita y el tambor.

13:30 Teatru pel pueblu col Ñeru los Coríos.

18:00 Canción asturiana con: Anabel Santiago, Mariluz Cristóbal, Jeremias Cuello, Bibiana Sánchez y el gaiteru Hugo Noval.

19:00 Teatru col Ñeru los Coríos.

21:00 Pieslle del mercáu cola Bandina "Nun yes tú".

Amás, durante los dos díes van animar el mercáu Hector Braga, colos sos instrumentos, romances, cancios, etc.. La Bandina "Nun yes tú" (la Bandina más prestosa), y delles coses pa los más neños de la casa, paséos n'asturcón, talleres de cerámica, dibuxu, xuegos tradicionales, etc.

Va disponese d'un Alcotan pa subir de baldre dende La Pola Llaviana a Tolivia.

Puntu final a Tolo d'Asturies 09

Pasó'l fin de selmana y terminaron les actividaes de la tercera amuesa cultural Tolo d'Asturies 2009. L'Ayuntamientu Llangréu xunto cola conseyería de cultura y turismu, la collaboración de Cajastur y El Rincón de Eladio y la organización de L'Agrupación d'Etnografía y folclor Reija de Llangréu, ficiéron un gran esfuerzu pa llevar alantre esti proyeutu que pon enriba la mesa un cartel como hai pocos na programación cultural d'Asturies. Dende'l Grupu Reija prestábanos dar les gracies a tola xente que fizo posible que Tolo d'Asturies 2009 fuera una rialidá y sobre manera a tola xente que se averó poles carpes de la estación d'autobuses de Llangréu, sofitando esta iniciativa y dando-y sentíu. La edición del 2009 ya ye hestoria, esperamos que nel 2010, tolos llangreanos se sientan orgullosos d'esta folixa que ye d'ellos, asina como de tola xente que-y presta la cultura asturiana y la cultura en xeneral, seyan d'onde seyan, y que Tolo d'Asturies se convierta nuna cita ineludible, a l'altor de la folixa de mieres o l'Ascensión d'Uviéu.

Munches gracies a toos y toes.

La semeya, ye del espectáculu Xideces, de la Banga Gaites Llacín, de Llanes.

El Cursu de Curdión Diatónicu

Güei fina'l cursu de curdión diatónicu que se vien cellebrando durante estos tres díes de Tolo d'Asturies, na casa los Alberti de Ciañu. Escolinos de la escuela de música tradicional Reija de Llangréu y de otres munches escueles repartíes pola xeografía asturiana, diéronse cita, pa facer un cursu intensivu alrodiu d'esti prestosu instrumentu. El fechu de cuntar con profesores del altor de Filippo Gambeta, el aragonés Ignacio Alfayé o l'asturianu Xuán Nel Expósito, foi un aliciente más pa que la inscripción fuera un exitu rotundu cuntando con alumnos de dellos conceyos asturianos, que nun dexaron pasar la cita de Ciañu.

Estes son dalgunes de les semeyes que pudimos facer el vienres. Nos próximos díes pondremos más semeyes de lo que foi esta tercera edición de Tolo d'asturies que güei llega'l so fín con dellos conciertos, a partir de les 18:00, na carpa de la estación d'autobuses de Llangréu.

Actu d'entamu de Tolo d'Asturies

Esta tarde inaugurose la Casa lo Alberti de Ciañu, y de magar les siete la tarde fízose l'actu d'entamu del 3º Festival Tolo d'Asturies 2009. Amás de desplicar el programa y los estremaos oxetivos, hebo un conciertu d'escolinos de la escuela de música tradicional del Grupu Reija y de los tres mayestros curdioneros que van dar los cursos qu'entamen mañana pola mañana, na mesma casa los Alberti que ta asitiada nel parque de Ciañu. El primeru d'ellos foi l'aragonés Ignacio Alfayé, que tocó pieces tradicionales, populares y de composición propia.

La nota internacional púsola el virtuosu de la curdión, Filippo Gambeta que vamos poder ver nos conciertos de Tolo d'Asturies col so grupu Il Liguriani. Tou un espectáculu, el sentir tan de cerca, los ritmos de la fastera italiana de Xénova, na curdión d'esti músicu.
El filu conductor llevolu Xuan Nel Expósito, profesor de la escuela de música tradicional del Grupu Reija de Llangréu y collaborador no que cinca a la esbilla del programa de Tolo d'Asturies. A partir de mañana pola mañana, entamen los cursos con estos tres mayestros de luxu.

Sienra, Mercáu tradicional del valle del nalón

PROGRAMA

VIENRES 08 DE MAYU

DÍA DE LOS ESCOLINOS
A les 10:00, estruendu de volaores anunciará el entamu del V MERCÁU TRADICIONAL VALLE’L NALÒN. Inauguración coles autoridades del Ayto. de Samartín del Rei Aurelio. Que van dar pasu a distintos personaxes de la dómina interpretaos po’l grupu teatru’l “REFAXU” y el grupu teatro “LA CASCAYA”.
A les 11:00, actuación de títeres, magos, malabaristes que se encargarán de recibir a los escolinos de toa asturies que vienen de visita.
De 12:00 a 14:00 y de 17:00 a 20:00 xuegos pa neños ( rana , aros, boliches, chapes, zancos, llave…)
A partir de les 17:00 la bandina “LOS DEL ORICIU FRESCU” van acompañanos no que queda de día colos sos sones.
A les 17:00 actuación de malabares cola Cia. DE CIRCO “EL ÑERU LOS CORÍOS” y el mago “MARIO LARREA”.
A les 19:00 actuación del grupo folcloricu Blimea na so sección infantil en cualquier rincón de Sienra, darréu fadrán la so actuación los mayores del “GRUPU FOLCLÓRICU
BLIMEA”.
A les 20:00 cantares nel chigre del mercau a cargu del coru “ SAN ANDRÉS” de L’entregu.
A eso del escurecer, nueche máxica onde van visitanos los personaxes de la mitoloxía asturiana ( paparrosoya, cuélebre, nuberu, trasgos, xanes…)
Pa finar el día, na plaza del pueblu vamos echar unos bailes amenizaos pola bandina.
“LOS DEL ORICIU FRESCU”.

SÁBADU 09 DE MAYU

DÍA PA MERCAR
A les 12:00 apertura del mercáu con estruendu de volaores y el son de la gaita y el tambor.
A lo llargo del día vamos poder ver muestres d‘oficios en vivo en los puestos del mercau, y ver tratos de ganao, y dalgunes ocurrencies intepretaes polos grupos de teatru’l “REFAXU” y “LA CASCAYA”, los dos de Blimea.

A partir de les 12:30 vamos sentir los sones de la bandina “LOS DEL ORICIU FRESCU” per tolos rincones del mercau, acompañándonos hasta finar el día.
A les 13:00 cantares de les PANDERETERES DE XIXÓN nel llar.
A les 18:00 los neños del “GRUPU FOLCLÓRICU BLIMEA” van a invitamos a xugar, baillar y canciar con ellos.
A les 18:00 toparemos per cualesquIer rincón del mercau a les “PANDERETERES DE XIXÓN”.
A partir del les 20:00 nel chigre del mercáu cantares de chigre a cargu del coru “SAMARTÍN” de sotrondio.
A les 19:00 los malabares de la CIA DE CIRCO “ EL ÑERU LOS CORÍOS” y el mago “MARIO
LARREA” van a entretenemos coles sos mañes.

Al escurecer un estruendu de volaores de luz, collor y soníu van a despertar a tolos seres mitolóxicos que nos visiten nel mercáu. Dempués del fueu vamos poder baillar y canciar cola bandina, nel chigre’l mercáu.

DOMINGU 10 DE MAYU

ROMERIA N’HONOR DE LA VIRXE DE LOS DESAMPARAOS DE SIENRA.
A les 11:00 la alborá de la gaita y el tambor anunciará el entamu del día y, comu tolos díes, los personaxes de los grupos de teatru EL REFAXU Y LA CASCAYA, van facenos pasar un bon día.
A les 12:30 salida de la procesión n’honor de la virxe los desamparaos dende ‘l Miramar, acompañá pola gaita y el tambor y los cantares del ramu a la patrona de la fiesta.
A les 13:00 misa na capilla sienra
Al finar la misa puya’l ramu y darréu baille a lo suelto na plaza’l pueblu. Amenizáu pol Grupu folclóricu Blimea.
A les 17:00 representación d’una obra teatru costumista a cargu del grupu teatro ‘EL REFAXU.
n’acabando’l teatro pasacalles de la Bandina’l grupu folclóricu blimea, hasta finar el mercáu.

El textu fízonoslu llegar xente del grupu folklóricu Blimea.

Más info en http://www.gfblimea.blogspot.com/

Programa Oficial Tolo d'Asturies 2009

Xueves 14 mayu

19:00 hores Presentación oficial III Muestra Cultural Tolo d’Asturies
Conciertu Ignacio Alfayate + Filippo Gambeta + Xuan Nel Expósito + Alumnos Escuela Acurdión de la Escuela de Música Tradicional Reija de Llangréu
Inauguración Esposición Acurdión Tradicional
Inauguración cursos acurdión diatónicu de la Escuela de Música Tradicional Reija de Llangréu (Nivel mediu y superior)

(Centru la Cultura y la Llingua Asturiana Casa los Alberti, Ciañu).

Vienres 15 mayu

22:00 hores Conciertu

I LIGURIANI (Italia) + *LOS CIQUITRINOS + *LOS GATOS DEL FORNU

*(FACIENDO L’INDIO NA CAI, espectáculu presentación de los dicos Faciendo l’Indio-Los Ciquitrinos- y Na Cai- Los Gatos del Fornu)

Sábadu 16 mayu

12:00 hores Apertura Oficial Muestra Cultural TOLO D’ASTURIES
12:00 hores Banda Gaites Conceyu Llangréu
13:00 hores Conciertu HERMANOS VALLE ROSO

22:00 hores Conciertu

**XIDECES (BANDA GAITES LLACÍN + ARTISTES CONVIDAOS) + DAVID MUNNELLY BAND (Irlanda) + HERBAMORA

** (Más de 100 músicos nel escenariu, espectáculu qu’inclúi un pasucais previu dende El Parque Vieyu La Felguera hasta la Estación Central d’Autobuses de Llangréu)



Tol día: Mercáu tradicional d’artesanía y gastronomía
Feria del discu y el llibru n’asturianu
Folixa y baille pa toes/os con bandines tradicionales
Animación con grupos de baille y música tradicional
Talleres pa neñes y neños (animación, xuegos y deportes tradicionales, artesanía…)

Domingu 17 mayu

12:30 hores Conciertu Banda Música de Llangréu
13:30 hores Toná
18:00 hores Conciertu HÉCTOR BRAGA
19:00 hores Carta blanca a Tomás Zapico (Presentación del so discu y reinterpretación d’una escoyeta de temes del repertoriu d’esti músicu de La Güeria Urbiés a cargu d’acurdionistes modernos del altor de Marga Lorences, Nel Ordóñez, David Varela, Jose Manuel Tejedor y Marcos Alonso). Homenaxe a la tradición del acurdión, cola dirección de Xuan Nel Expósito y la collaboración y presentación de Xosé Antón Fernández “Ambás”

Tol día: Mercáu tradicional d’artesanía y gastronomía
Feria del discu y el llibru n’asturianu
Folixa y baille pa toes/os con bandines tradicionales
Animación con grupos de baille y música tradicional
Talleres pa neñes y neños (animación, xuegos y deportes tradicionales, artesanía…)


20:30 hores Clausura de la “III Muestra Cultural TOLO D’ASTURIES de LLANGRÉU”

VII Alcuentru de pandereta gallega ya asturiana

El sábadu 9 de Mayu va cellebrase el sétimu alcuentru de pandereta gallega ya asturiana nuna convivencia de reonocimientu ente la tradición d'Asturies y Galiza. L'alcuentru será, como ye vezu, nel albergue El Sabil, que ta a la salida de Villanueva en dirección a Quirós, nel Conceyu Santu Adrianu. Contarase cola participación dos grupos de cantu tradicional: -Veña que vai! (O Morrazo-Galiza) y Pandereteres de Nerbia (Asturies).

Más información sobre l'alcuentru.

Tolo d'Asturies III, mayu 2009

Adelantu del programa de Tolo d'Asturies III na so edición 2009.

Esti añu la fiesta d'asturianía va durar cuatro díes, el 14,15,16 y 17 de mayu. Tolo d'asturies consolídase cola so tercer edición con un cartel sin precedente, afitándose como una de les amueses culturales más importantes d'asturies.

XUEVES 14
Inauguración de la exposición de la curdión diatónica a cargu de Jose María López (Musical Dumboa) na Casa los Alberti de Ciañu. Na inauguración actuarán Filippo Gambetta (Italia), Ignacio Alfayé (Aragón) y Xuán Nel Expósito (Asturies), asina como dellos escolinos de la Escuela de Música Tradicional del Grupu Reija.

VIENRES 15
Entamen los cursos de Curdión Diatónicu colos mayestros Ignacio Alfayé y Filippo Gambetta. Presentación del Llibru "El Acordeón en España hasta 1936" de Javier Ramos.
Pola nuechi les actuaciones entamarán a partir de les 22:00 hores. El vienres van tocar I Liguriani, Gatos del Fornu y los Ciquitrinos presentando'l so espectáculu "Faciendo l'indiu na cai".

SÁBADU 16
El sábadu enantes que llegue la nueche van cantar Los Hermanos Valle Roso. De magar les 22:00 h. será'l turnu de la Banda Gaites Llacín col so espectáculu "Xideces", Herbamora (antigües Dulcamara)y David Munnelly Band.

DOMINGU 17
Caberu día de l'amuesa cultural con delles actuaciones de tonada y l'espectáculu "Carta Blanca a Tomás Zapico" onde dellos curdioneros van facer un homenaxe al desapaecíu curdioneru de la Güeria d'Urbiés con formaciones de tríos y duos.

Amás de too esto habrá delles actuaciones y actividaes más entá por confirmar.

XXX Semana del Folklore Astur

El mes d'abril va ser otra vuelta l'escenariu onde se desendolque la XXX Selmana del Folklore Astur qu'organiza'l Grupu Folklóricu y de Investigación El Ventolín y qu'esti añu va cincar a "El baile n'Asturies". Les actividaes d'esta XXX Semana del Folklore Astur entamará'l lunes 6 d'Abril a les 20 hores cuando se presente nel Club de Prensa de La Nueva España la programacion de la selmana.

El llunes 13 d'Abril a les 20 hores na Casa Municipal de Cultura fadráse l'apertura oficial cola entrega de medalles de plata y un conciertu de curdión a cargu de Xuan Nel Expósito. La programación de la Selmana inclúi tres esposiciones pa la selmana del Folclore astur.

El miércoles 15 d'Abril a les 20 hores na Casa Municipal de Cultura celebrarase una conferencia sobre'l tema “El baile n’Asturies” a cargu de Fernando Manuel de la Puente Hevia.

Y el xueves 16 de Abril, a les 20,30 hores representarase na Casa Municipal de Cultura una escenificación de teatru costumista asturianu a cargu del Grupu de teatru de Carbayín cola obra “Ello yera una vez……”.

Pa finar la selmana, el sábadu 18 d'Abril a les 20 hores na Casa Municipal de Cultura celebrarase'l tradicional Festival Folclóricu Nacional colos grupos Vezos Astures, Centro Asturiano de Madrid, profesores de la escuela de música tradicional del ventolin y el G.F.I. El Ventolín.

El textu la noticia ta sacáu de http://www.asturnews.com/

Más información en http://www.elventolin.com/

Blogue del Grupo Folklorico Blimea

Dando un paséu pola rede acabamos d'atopar el blogue del Grupo Folklorico Blimea. Esti grupu tien una vieya andadura nel mundu del floclor tradicional, entamada na década de los 5o. Préstanos compartir esti blogue con vós pa que-y podais echar un güeyu y conocer más sobre esti grupu emblemáticu de la cuenca'l nalón.

http://gfblimea.blogspot.com/

Manifestación el sábadu 7

Una vegada más, una representación del Grupu Reija de Llangréu tará nes cais d'Uviéu sofitando la manifestación entamada pola Xunta pola Defensa de la Llingua asturiana. La cita ye delantre la estación del norte d'Uviéu a les 17 hores del sábadu 7 de marzu. Esta vez el llema ye "La lligua asturiana en maxisteriu y nel sistema educativu".

Tola información na páxina de la Xunta.

Antroxu 2009 Llangréu

Ya ta puesta na nuesa páxina http://www.reija.as/ la ficha del antroxu 2009 pa descargar. Esta ficha va poder cambiase pol dorsal EL MARTES 24 A PARTIR DE LES 15,30 HORES NA CASA LA CULTURA DE LA FELGUERA. La concentración va ser a les 17,15 hores nel Parque Vieyu (Dolores F. Duro), pa facer un desfile al colexu Eulalia Álvarez Lorenzo donde va tener llugar la entrega de revoltixos y la folixa infantil col grupu XIP-XAP. En casu de lluvia accederáse directamente al colexu Eulalia a les 17,30 horas.

Como tolos años, el Grupu Reija, collabora na organización del Antroxu Infantil de Llangréu.

Equí podeis ver el programa:

Calendariu 2009

Ya podeis descargar na web http://www.reija.as/ el nuevu calendariu 2009 del Grupu Reija. Ya se pue ver y baxar el calendariu que'l Grupu Reija tien el vezu de ufiertar nel mes de Xineru. Les semeyes fueron feches nos meses de payares y avientu, en delles sesiones onde la xente del grupu fizu un añu más de modelos. Esperamos que vos preste.

Podeis descargar el calendariu de baldre directamente, calcando equí.

Tornamos de Mahó

L'Agrupación Reija tornó el pasáu domingu 26 d'ochobre del so viaxe a Mahó (Menorca). L'exe central de les cellebraciones xiró en tornu a la “8ª Volta Cicloturista Internacional a Menorca” que nesta ocasión taba dedicada al ciclismu asturianu con un homenax al ciclista Chechu Rubiera y cola participación de los corredores Samuel Sánchez, Carlos Barredo, Dani Navarro, Santi Perez, Benjamín Noval y Rocio Gamonal.

La delegación y el Centru Asturianu collaboraron col eventu mostrando delles facetes de la cultura y gastronomía asturianes. Les actuaciones y amueses de baille tradicional realizaes por Reija durante esos díes contaron con una bona acoyida y reconocimientu por parte de los menorquines y asturianos presentes. La experiencia resultó del too gratificante, tanto pol viaxe y la estancia na islla, como por el tratu recibíu. L'Agrupación Reija quier dar les más sinceres gracies a la presidenta Natividad Quirós y al restu de persones del Centru Asturianu de Menorca por habenos invitao.

Les semeyes son del fotógrafu Luis Navazo.

Manifestación pola Oficialidá

El cuatru d'ochobre hai otra oportunidá d'expresanos en llibertá ante la situación vergoñosa que sufre una parte tan importante de la nuesa cultura, como ye la llingua'l pais. El Conceyu Abiertu Pola Oficialidá convoca una nueva manifestación a les 18:00 hores na estación del norte d'Uviéu, enantes de que'l nuevu estatutu d'autonomía se pieslle en falsu. Si tienes conciencia social y te pruyen les inxusticies, esta tócate bien cerca. Tamos ante unu de los momentos más importantes d'estos últimos 30 años de vindicación llingüistica. Agora ye'l momentu de que se te vea y de que se te sienta. Esperámoste n'Uviéu el 4 d'ochobre, pola oficialidá de la nuesa llingua.

Viaxe a Mahó

El grupu Reija tien previstu un viaxe a Menorca n'ochobre. Tres varios años faciendo lo posible por dir a actuar a la localidá menorquina de Mahó, por fín, nel 2008 paez que va ser posible. Ya entamaron los trámites alministrativos pa preparar el viaxe que llevará a la xente de Reija, los díes 24, 25 y 26 d'ochobre a la islla balear. Tamos ante la primer vegada que'l grupu va viaxar usando como mediu trasnporte un avión, ya que les otres vegaes, siempes se viaxó n'autocar, aunque fuera a destinos muncho más llonxanos. Esperemos que nun haya negún contratiempu y por fín, el 2008 seya'l añu que vea baillar la xota'l centru cola panza enllena de sobrasada y ensaimada.

Pa más información http://www.eyfasturiano.mforos.com/

Reija Torna a San Pedru

Dempués de munchos años ensin actuar nes fiestes felguerines, esti añu el Grupu Reija tornó a baillar nes cais de La Felguera. Con motivu del 100 aniversariu de la sociedá de festeyos de La Felguera, el Grupu Reija torna a collaborar nos festexos san pedrinos faciendo un pasacais, baillando y echando un gabitu na danza, delantre la ilesia. Equí podeis ver unes semeyes d'esi día.

Podeis veles toes en http://www.flickr.com/photos/reija/

Y nun escaecer el nuevu foru del grupu dedicáu a la música, tradición, indumentaria, etc., y donde tú tamien te pues dar d'alta pa entamar a falar cola comunidá. La direicción ye: http://eyfasturiano.mforos.com/

Nuevu Foru del Grupu Reija

Préstanos compartir con toos vosotros la creación d'un nuevu foru rellacionáu col Grupu Reija, la tradición asturiana, música, indumentaria y la cultura y actualidá d'asturies en xeneral. Pa poder postear nel foru ye imprescindible dase d'alta con nome d'usuariu y contraseña. Dempués d'eso, ya se pue entamar a escribir y compartir coses colos demás usuarios. El rexixtru ta abiertu a tola xente que quiera compartir, aprender y enseñar coses o falar ensin más. Esperamos qu'esti nuevu instrumentu na rede, tenga una bona actividá y llegue a ser un foru vieyu y asentáu nesi requexu que ye la rede dedicao a la llingua y cultura asturiana, en toes les sos vertientes. Esta ye la direicción del foru:

http://eyfasturiano.mforos.com/

Gracies a Celsa Suárez pol so trabayu.

Les Últimes Semeyes

Equí va la cabera entrega de les semeyes que pudimos esbillar. Una amuesa de la xente que pasó poles carpes y l'ambiente qu'había.

Xosé Antón Ambás colos informantes curdioneros nel homenaxe a la curdión na tradición.

Otra toma de la exposición d'indumentaria fecha pol Grupu Reija.

Un detalle más d'una de les curdiones que formaben parte de la exposición.

Les cámares de la TPA tamién se ficieron ecu de tolo qu'aconteció el fín de selmana faciendo inclusu un programa en direutu.

Más Semeyes de Tolo d'Asturies 2008

Siguimos coles semeyes, esta ye d'un momentu de l'actuación del grupu Filandón d'Uviéu, na carpa del mercáu.

Les curdiones que se pudieron ver durante tola fin de selmana.

Na carpa de les exposiciones, había un requexu reserváu pala indumentaria tradicional asturiana que xente del Grupu Reija se encargó personalmente de montar.

Ente les actividaes más cellebraes tuvieron los conciertos de la nueche, na carpa del bar y el escenariu. Na semeya pue vese a Los Ciquitrinos faciendo les prebes de soníu pola tarde.

La cosa nun termina equí, por qu'entá quede más semeyes qu'esperen salir a la lluz. Será n'actualización de próximos díes. Alcordavos que podeis veles toes equí.

Semeyes de Tolo d'Asturies 2008

Equi vamos mostravos dalgun retratu que pudimos sacar nos tres díes que duró la amuesa Tolo d'Asturies, aunque ye verdá que sacamos menos de les que nos hubiera prestao, pero nun se pue tar a too.

Ehí va un tríu de campeonatu, Javi, Iván y Dani.

El folclor y la tradición ocupó un puestu cimeru na programación de Tolo d'Asturies. Nesti casu, el grupu El Filandón d'Uviéu, baillando a lo suelto y faciendo una mecigaya prestosa, ente folixa y tradición.

Les exposiciones captaron en forma l'atención de la xente, asina como la feria del discu y el llibru n'asturianu, que fueron un complementu perfeutu a la música y el baille.

Podeis ver toles semeyes nesti enllaz: http://www.flickr.com/photos/reija/

Intentaremos subir dalguna más segun vayan saliendo del carrete. Un saludu.

Finó Tolo d'Asturies

Llegó'l final d'esti fin de selmana dedicáu a la cultura y tradición asturiana. Dempués de tres díes onde, la música, el baille, les exposiciones, los puestos, los cursos, los talleres, la tradición y los homenaxes llenaron el tiempu y l'espaciu de les carpes asitiaes na estación d'autobuses de Llangréu, el cansanciu y la satisfación ayuden a poner el puntu final a la segunda edición de Tolo d'Asturies. Dende'l Grupu Reija prestábanos dar les gracies a tolos artistes que participaron nesta edición, amosando la so profesionalidá dende toles estayes que formaben les diferentes amueses culturales. Asina como a toles entidaes de de dalguna forma echaron un gabitu pa que la edición d'esti añu de Tolo d'Asturies saliera alantre. Pero sobre manera, prestábanos agradecer a cada una de les persones que se averó durante los tres díes a les carpes de la feria, sofitando la folixa alrodiu la nuesa cultura y demostrando ante la prensa y autoridaes que'l sofitu a la cultura asturiana tien una rempuesta perbona ente la xente de toles edaes y que aguaño ye un deber de toos y toes, siguir guardándola, promocionándola y esparciéndola. Esperemos que la feria Tolo d'Asturies siga siendo una cita obligatoria nel calendariu cultural asturianu, por munchos años. Munches gracies, xente.

Noticia n'Asturies.com

La "II Muestra Tolo d'Asturies", que se vien celebrando dende'l vienres 23 nel conceyu de Llangréu, pon el ramu esti domingu cola actuación del músicu llangreanu Héctor Braga, al que siguirá l'homenaxe al mundu y la tradición del acurdión de la mano de la direición de Xosé Antón Fernández "Ambás" y una amplia presencia xeneracional, cola participación d'acurdionistes vieyos y mozos.

D'otru llau, el sábadu y el domingu la bandina tradicional "A seques" animará la feria cola so música, el baille y les sos histories, tratando de conectar col públicu algamando la so complicidá y la so participación, tratando de xuntase cola xenta nun espectáculu interactivu enllenu de folixa y bon humor. Amás neños y neñes podrán disfrutar del taller d'alfarería que yá tuviera presente l'añu pasáu na amuesa. D'otra manera esti añu y como novedá na feria, l'Equipu de Deporte Tradicional Monte Areo pondrá muestres y talleres de deportes y xuegos tradicionales asturianos. Na tarde del sábadu, toos, mayores y pequeños, podrán disfrutar de la música de Xentiquina. Esti coru guah.es de la escuela pública Solvay de Lieres son yá un clásicu y baxo la dirección de Nacho Fonseca tienen el vezu de poner los sitios onde actuen pates arriba, un conciertu bien prestosu con cantares bien conocíos pa lo pequeño de la casa, con gran frescura y naturalidá consiguen siempre la complicidá y participación del públicu adulto ya infantil. N'acabando l'actuación de Xentiquina actuará'l monologuista Carlos Alba "Cellero".

Nesa mesma nueche tendrá llugar el conciertu qu'axunta a los músicos: Iñaki Diéguez Tríu (Euskadi), Hammon-Martin Quintet (Bretaña) y Dixebra.

Noticia d'asturies.com

Trípticu y Cursos

Esti ye'l trípticu col programa y el textu per detrás, con un diseñu inspiráu nuna curdión de botonera. La curdión ye l'instrumentu al que ta dedicáu esta edición de Tolo d'Asturies y va marcar les actividaes de la fín de selmana, tanto colos conciertos como colos cursos que van dar los maestros curdioneros veníos de fuera d'Asturies y coordinaos por Xuán Nel Expósito. Pa tener tola información sobre los cursos que se van dar nesta edición de Tolo d'Asturies y apuntavos, podeis llamar al teléfonu 649640700 y falar con Expósito direutamente.

Programa Tolo d'Asturies 2008

El programa definitivu que se pue topar nos trípticos que ya se tan repartiendo, ye:

Vienres 23 de mayu:

22:00 hores Conciertu de Los Ciquitrinos (Asturies), Marful (Galicia) y Nuberu (Asturies).

Sábadu 24 de mayu:


12:00 hores Apertura de l'Amuesa Cultural Tolo d'Asturies.

12:00 hores Banda Gaites Conceyu Llangréu.

12:45 hores Banda Música Conceyu Llangréu.

13:30 hores Conciertu Alfaye/Martín (Aragón).

18:00 hores Conciertu Xentiquina.

19:00 hores Monologuismu asturianu, Carlos Alba "Cellero".

22:00 hores Conciertu: Iñaki Diéguez Tríu (Euzkadi), Hammon-Martin Quintet (Bretaña), Dixebra (Asturies).

Tol día folixa y baille pa toes/os cola bandina tradicional A Seques. Animación con grupos de baille y música tradicional. Taller d'alfarería pa neños y neñes (L'Alfar de Faro- Uviéu). Amueses y talleres de deportes y xuegos tradicionales asturianos (Equipu de deporte tradicional Monte Areo).

Domingu 25 de mayu

13:30 hores Toná (Avelino Fernández Corte, Fernando Valle Roso y Marisa Valle Roso).

18:00 hores Homenaxe a la tradición del acurdión, cola collaboración y dirección de Xose Antón Fernández "Ambás".

Homenaxe a Tomás Zapico.

Tol día Folixa y baille cola bandina tradicional A Seques. Animación con grupos de baille y música tradicional. Taller d'alfarería pa neñes y neños (L'Alfar de Faro- Uviéu).

20:00 hores Clausura de la "II Amuesa Cultural Tolo d'Asturies de Llangréu".

Cursos de curdión, nivel mediu y avanzáu.

Más Información Sobre "Tolo d'Asturies 2008"

Ya se puen ver poles cais, los cartelos de "Tolo d'Asturies 2008", asina como los trípticos que tienen el programa completu con horarios y actividaes, acompañaos d'un completu textu. En unos díes colgarémoslo nesti blogue, por qu'hai dalgún cambiu piquiñín, no que cinca a los horarios, con respeuto a la noticia espublizada, va unos díes, por asturnews.

Ya diximos qu'esti añu, "Tolo d'Asturies" ta dedicao al curdión diatónicu y la mayor parte de los grupos que van formar parte d'esta amuesa cultural, xiren alrodiu d'esti instrumentu. La ufierta compleméntase con unos cursos, impartíos polos curdioneros que van venir de lloñe a tocar y embaxo la coordinación de Xuan Nel Expósito, conocíu curdioneru y mayestru na Escuela de Música Tradicional "Reija". Al entamu d'esta selmana, esperamos cuntar con tola información, pa poder espublizar, un teléfonu de contautu onde poder informase sobre'l conteníu, horariu y preciu de los cursos.

Por otru lláu, ya se puen ver montaes delles de les carpes qu'abellugarán l'amuesa cultural, na estación d'autobuses de Llangréu. Asina que, a lo llargo la selmana, nun vos esmolecer pol tiempu que faiga.

Una mala noticia

Tomás de La Güeria, el curdioneru al que se-y diba a facer un homenaxe el domingu 25 de mayu, dientru de l'amuesa cultural "Tolo d'Asturies II" falleció fai unos díes a los 84 años. Tomás, foi ún de los informantes del programa de la tpa, "Camín de Cantares", amás de tener un discu en puertes d'espublizase.

L'homenaxe tresfórmase, tristemente, en póstumu, tras el fallecimientu d'otra persona cola que muerre un requexu de la cultura'l país.

Llangréu acueye'l 23, 24 y 25 de Mayu la II Muestra Cultural "Tolo d'Asturies"

Equí podeis ver el textu íntegru de la noticia espublizada en asturnews:

Los próximos díes 23, 24 y 25 de mayu, la estación d'autobuses de Llangréu va acoyer la “II Muestra Cultural Tolo d ’Asturies”. Durante tola selmana van tener cabida nel recintu ferial músicos de diversos ámbitos de la escena asturiana, esposiciones d'instrumentos, vestimenta y artesanía tradicional, xuegos y deportes, puestos de venta de productos gastronómicos tradicionales y una feria del discu y del llibru n'asturianu. L'eventu ta organizáu pol Ayuntamientu de Llangréu.

El 24 de mayu entama oficialmente la Muestra pero un día antes va cellebrase un conciertu (a les 22:00 hores) nel que van participar Nuberu, los vascos del Iñaki Diéguez Tríu y los gallegos Marfiul. Al día siguiente, 24 mayu, a les 12:00 hores tendrá llugar la inauguración oficial de la feria cola apertura de la I Feria del discu y el llibru n’asturianu, los puestos de venta, y les distintes esposiciones. Na inauguración van participar dellos grupos de baille tradicional y la Banda Gaites del Conceyu de Llangréu.

Pa esti sábadu tamién tan previstes les actuaciones del grupu aragonés Alfaye/Martín (13:30 hores), Xentiquina, embaxi dirección de Nacho Fonseca (18:00), y la bandina tradicional "A Seques". A les 22:00 hores va tener llugar el platu central del día con un conciertu nel que van tar tocando Dixebra, Los Chiquitrinos ya'l grupu bretón Hammon Martín-Quintet.
La xornada dominical entama a les 13:30 hores, col recital de tonada asturiana al cargu d'Avelino Fernández Corte, Fernando Valle Roso y Marisa Valle Roso pa siguir a les 18:00 col conciertu del llangreanu Héctor Braga y rematar con un homenaxe un a la música d'acurdión, nel que van tomar parte dellos curdionistes vieyos y mozos cola embaxo la coordinación de Xose Antón Fernández "Ambás".

Organizando "Tolo d'Asturies 2008"

Tamos en disposición d'anunciar que se ta trabayando duramente para que los díes 23, 24 y 25 de Mayu pueda cellebrase la segunda Feria "Tolo d'Asturies" en La Felguera, Llangréu. Tres l'éxitu de la pasada edición y la preba de fuéu que supuso organizar por primer vegada un eventu d'estes carauterístiques, esti añu dase continuidá a esta feria aumentando les actividaes, los metros de carpes y los conteníos. Entá ye pronto pa dar datos concretos sobre conciertos, horarios y demás pero dende esti blogue podemos dar l'anuncia qu'esti añu, "Tolo d'Asturies" va tar dedicada a la Curdión Diatónica, con unos conciertos, exposiciones y actividaes que nun tienen precedente n'Asturies, hasta anguañu. Tar atentos los amantes de la cultura asturiana en toles expresiones que podamos imaxinar y sobremanera, los curdioneros.

En cuantu podamos dir verificando horarios y conteníos, espublizarémoslo equí.

La Xiraldilla nel Mercáu de La Nueva

Esti ye un vídiu de l'actuación del Grupu Reija nel Mercáu de La Nueva nel 2006. Nesti mercáu, ye vezu dende fai años que'l nuesu grupu ambiente la escena con música y bailles. Esti en concretu, ye la Xiraldilla. Gracies a Pau por colgalu na rede

El Grupu Reija Collabora col Antroxu Infantil 2008

Dende la páxina del Grupu Reija pue descargase la fueya p'apuntase al Antroxu Infaltil 2008 de La Felguera, que se va cellebrar el martes, 5 de febreru. Dende’l día 29 de xineru, les fiches d'inscripción podrán garrase na Casa la Cultura La Felguera, o descargase na páxina web http://www.reija.as/ .

Eses fiches cambiaránse pol dorsal correspondiente na propia Casa de la Cultura ente les 10.30 y les 17 hores del mesmu día 5. A les 17.15 hores va facese una concentración de tolos participantes nel parque Vieyu (si ye qu'orbaya, la concentración fadráse na pista les escueles públiques Eulalia Álvarez Lorenzo). Ente les actividaes pa esi día destaca'l desfile dende'l parque pa la pista les escueles, onde se cellebrará la fiesta d'antroxu con música, regalos y xuegos… hasta les 20.30 hores.

Dientro de la seición "noticies" de la páxina http://www.langreo.as/ teneis el programa coles feches y hores de tolos antroxos de Llangréu.

Calendariu 2008

Nel entamu d'esti 2008, el Grupu Reija ta acabantes d'asoleyar un calendariu con semeyes de la xente que forma parte de l'Agrupación. En principiu va repartise ente la xente allegao y los compromisos institucionales y asociativos. Les doce semeyes que componen esta espublización tan feches polos fotógrafos felguerinos, Nachín y Silvia Martín en delles sesiones y llocalizaciones del Conceyu Llangréu. Con esti calendariu, el Grupu Reija tien l'enfotu de desear un bon añu 2008 coles másimes satisfacciones pa toos y toes.

Si el calendariu nun llega ales tos manes, en reija.as pués descargalu de baldre.

El Grupu Reija en Marcha pola Oficialidá

El 24 Payares de 2007, dellos miembros del Grupu Reija participaron activamente nes movilizaciones organizaes pol Conceyu Abiertu pola Oficialidá. Nesta xornada de reivindicación cultural, el Grupu Reija sofitó, como integrante del C.A.O., les actividaes a lo llargo de tol día. Dende les once la mañana varios integrantes del grupu participaron na marcha que salió dende La Felguera y que agrupaba a tola xente del Valle del Nalón, bien caleyando o con coches d'apoyu. Tras llegar a Uviéu a les 18 hores, xunióse más xente del grupu pa participar xunto con otres 20.000 persones na manifestación que recorrió la Cai Uría, piesllando una intensa xornada d'esfuerzu, orbayu y defensa del patrimoniu cultural asturianu.

La semeya ye cortesía de El Corralín.

Podeis lleer la crónica de la marcha equí.

Entamó'l Cursu 2007/2008

Nesti mes d'ochobre, ta acabantes d'entamar el nuevu cursu académicu 2007/2008 na Escuela de Música Tradicional del Grupu Reija. Esta veterana escuela nel Valle del Nalón, entama otru añu más el cursu, col mesmu porgüeyu col que nació, el d'esparcer y compartir la parte de la cultura asturiana que tien que ver col folclore y la música tradicional. Les materies que se van impartir estu añu son:

1. Gaita Asturiana.
2. Tambor Tradicional.
3. Curdión Diatónica.
4. Baille Tradicional.
5. Panderu y Pandereta.
6. Folclor y Tradición.
7. Llinguaxe Musical.

Pa ponete en contautu cola dirección de la escuela, namás tienes que mandar un corréu a: info@reija.as o bien llamar al teléfonu 676691424. Tolos martes y xueves, pues pasar poles aules del Colexu Públicu Eulalia Álvarez Lorenzo de La Felguera.

Equi pues descargar la fueya de matrícula:

http://www.reija.as/reija/index.php?option=articles&task=viewarticle&artid=18&Itemid=

¡Gracies!

Dende'l nuesu blog, prestaríanos dar les gracies a tola xente que, nestos pocos díes, visitó la nueva páxina web del Grupu Reija. Sobremanera a los que nos dexasteis esos mensaxes tan prestoso nel llibru de visites. Esperamos siguir faciendo medrar el nuesu espaciu web, con semeyes, nueves publicaciones y dellos proyeutos que tenemos na mente pa intentar desendolcar nel futuru. Un saludu y gracies a toos y toes pol sofitu que nos llegó tanto na rede como na cai.

Estrenu del Sitiu Web del Grupu Reija

Por fín, tan fináu el trabayu d'asoleyamientu de la primer páxina web del Grupu Reija. Aunque entá tien dalguna cosina por iguar, ya se pué ver la páxina na rede de redes, dende cualesquier lláu del mundu. Tres de la direición http://www.reija.as/ atópase la ilusión d'un garrapiellu de xente que lleva más de cincuenta años trabayando de forma totalmente altruista col enfotu de recoyer, protexer y divulgar la cultura del nuesu pueblu en tola so bayura. Dende güei, tamien se va poder facer esto, dende'l ciberespaciu, gracies a esti nuevu guaje que tenemos ente les manes.

Vémonos en http://www.reija.as/ .

www.reija.as

En breve tiempu van dase por terminaos los trabayos que tienen como fín l'asoleyamientu de la primer páxina web del Grupu Reija de Llangréu. Dempués de dellos meses de trabayu, la páxina ta apuntu de ser subida a la rede, col enfotu d'ufiertar delles coses d'interés, a tola xente que la quiera visitar. Dende http://www.reija.as/ van poder lleese noticies actualizaes del grupu, ver semeyes de viaxes, esposiciones, etc., saber un puquiñín más sobre la hestoria del grupu, tener información sobre la escuela de música, firmar nel llibru visites y baxar dellos trabayos que se lleven tiempu espublizando, ente otres munches coses.

Despedía de Sol y Pau

El sábadu 21 de xunetu, los integrantes del Grupu Reija, ficiéron-yos una espicha de despedía a les dos collacies arxentines que llevaben dellos meses ensayando y actuando col grupu. La so estancia n'Asturies taba lligada a la duración d'una beca d'estudios universitarios na Universidá d'Uviéu y una vez finada esta, llega la hora de tornar al llar.

A tola xente del grupu prestaría-nos desea-yos bon viaxe, que tengan un tornar dulce y suerte na so vida, ensin escaecer tolo que dexen equi y tolo que vivieron xunto a nós. Esperamos nun futuru non mui llonxanu, volver a topanos polos mundos de l'asturianía. Ta llueu, Sol y Pau.

III Mercáu Tradicional de Tolivia.

El sábadu 2 de xunu, ente les 16.00 y les 18.00 hores va haber paseos gratis n’asturcón pa les neñes y los neños del conceyu y a les cinco la tarde una mesa redonda dientro de los II Alcuentros na Caleya, titualada ‘Polémica al rodiu del embalse de Caliáu’.
A les seis de la tarde ‘Teatru pel pueblu’, el grupu ‘Teatro Sintexto’ va representar les obres ‘Ablaneres nel mercáu’ y ‘Declaración con sorpresa’. A les 18.00 hores una amuesa de deportes y xuegos rurales pa rapacines y rapacinos. Y a les ocho la tarde más teatru pela caleya, escenes con ‘Tomasa y Panchín’. La xornada va echar el pieslle a les 21.30 hores nel Cascayu, coles actuaciones d’Héctor Braga y Los Ciquitrinos.

El domingu 3 de xunu a les doce la mañana entama’l día con un pasucáis de gaita y tambor pel pueblu. De 12.30 a 14.00 más paseos gratis n’asturcón pa la guah.ería y a les doce y media la mañana una representación teatral. Darréu, a la una, va celebrase una nueva mesa redonda de los II Alcuentros na Caleya, embaxo’l títulu de ‘Repercusiones de los espacios protexíos nel desenrrollu rural”. Al meudía escenes de teatru de ‘Tomasa y Pachín’ y pela tarde más paseos n’asturcón y a les seis el ‘Festival d’Asturianía’ na llana La Peruyera, a cargu de l’Asociación de la Canción y el Folclore del Valle del Nalón, coles actuaciones d'un monologuista, un gaiteru y dellos cantantes. El día va rematase con baille tradicional asturianu en Cascayu a les seis y media y l’actuación de una bandina tradicional nel Llagar de La Pipa hacia les nueve la nueche.

Fonte: Asturnews.

Pieslle de la feria Tolo d'Asturies

Esti domingu echose el pieslle a la primer feria "Tolo d'Asturies" de Llangréu. Fueron tres díes que ficieron xusticia al nome que se-y pusu al eventu, ya que tantu la meteoroloxía como la amuesa cultural que taba programada nel cartel, fueron representantes cimeros, d'esi ampliu conceutu qu'abarca la pallabra Asturies. Los más de milenta metros de carpes que s'habilitaron pa resguardecese del temporal, abellugaron un mercáu tradicional d'artesanos, talleres y actividaes pa neños y neñes, amueses didautiques, actuaciones de bandes de gaites, tonada, grupos de baille, bandines, y cuentacuentos.

La xente de Llangréu, asina como d'otres partes de la xeografía asturiana y dalgún del restu l'estáu español, planto-y cara a la borrina y l'orbayu y dexose ver poles carpes de la Estación d'Autobuses, aumentando la asistencia del públicu conforme foi pasando la fin de selmana y llegando a xuntase el mayor númberu de xente conicidiendo colos conciertos qu'entamaron sobre les diez de la nueche.

La primer nueche, Llangréu tornó a danciar en corru en tornu a les dances entonáes por Tuenda y lluéu glayó y bailló hasta bien entrada la nueche, gracies a la música de Xuacu Amieva. El sábadu actuó el grupu infantil Xentiquina, que dexó a tola carpa enamorada de les sos voces y los sos bailles, con especial enfotu nel so rock and roll. Darréu compartieron escenariu el músicu poliinstrumentista Héctor Braga, que deleitó a los asistentes con un conciertu didáuticu y dexó a más d'un ablucáu al cantar tonada, acompañándose él mesmu a la gaita y Armando Valdés que fizo una charra col envís de dar a conocer el traxe'l país del home y la muyer.

Al cayer la nueche, los ritmos fusionaos d'Anabel Santiago punsieron a la xente sollerte, indicando que la nueche, amás de prieta y húmeda, diba a ser llarga y folixera. Los hermanos Tejedor piesllaron la xornada con un conciertu bien prestosu onde tuvieron que salir delles vegaes al escenariu por mor de la insistencia del públicu, finando col cantar del chalaneru que tan míticu ye en La Cuenca del Nalón y puso un broche d'oru a la xornada al xuntase'l públicu a andechar a los músicos cola lletra d'esti perconocíu cantar.

El domingu, la tonada del Che de Cabaños y los hermanos Roso, La Banda Gaites del Conceyu Llangréu, La Bandina Los Llanzones y el cuentacuentos Carlos Alba "Cellero", acompañaron a los asistentes hasta la clausura de la “I Muestra Cultural TOLO D’ASTURIES de LLANGREU”.

Esperamos y prestaríanos que se pueda repetir.

"I Amuesa Cultural TOLO D’ASTURIES de LLANGRÉU”

Va cellebrase en dos carpes puestes na Estación d'Autobuses de La Felguera (Llangréu). Los dos díes de la feria habrá puestos de venta representativos de l’artesanía y la gastronomía del país.

Vienres 18 mayu
±22:00 hores Conciertu Tuenda + Xuacu Amieva

Sábadu 19 mayu
±12:00 hores Apertura Amuesa Cultural TOLO D’ASTURIES
±18:00 hores Xentiquina
±19:00 hores Muestres didáctiques d’indumentaria ya instrumentos tradicionales a cargu d'Armando Valdes y Héctor Braga, con la collaboración de de les dos entidaes organizadores y de la escuela de musica tradicional de la A.E.F. Reija.

±22:00 hores Conciertu Anabel Santiago + Tejedor

Tol día:
Folixa y baille pa toes/os cola bandina Los Llanzones
Animación colos grupos de baille y música tradicional L’Enguedeyu (Llangréu) y San Félix (Candás).
Taller d’alfarería pa neñes y neños (a cargu de Selito del Alfar de Faro-Uviéu), mañanes de 12 a 14.30 y tardes de 17 a 20 hores.

Domingu 20 mayu
±13:00 hores Desfile Banda Gaites de Llangréu (Del Parque Vieyu La Felguera pa la Muestra Cultural TOLO D’ASTURIES en la Estación d'Autobuses).
±13:30 hores Toná (El Che de Cabaños, Marisa Valle Roso y Fernando Vallle Roso).
±18:00 hores Animación pa neñes y neños, cuentacuentos con Carlos Alba “Cellero” (El mio Güelu y Yo).

Tol día:
Folixa y baille pa toes/os cola bandina Los Llanzones.
Animación colos grupos de baille y música tradicional Reija (Llangréu) y Trebeyu (Xixón).
Taller d’alfarería pa neñes y neños (a cargu de Selito del Alfar de Faro-Uviéu).

±20:00 hores Si el públicu y la folixa lo permiten, clausura de la “I Muestra Cultural TOLO D’ASTURIES de LLANGREU”.

Integración Internacional

Paula Suárez y Soledad Perez, estudiantes arxentines na Universidá d’Uviéu gracies al programa ALAS, debutaron esti fin de selmana en La Nueva, Conceyu de Llangréu, como integrantes del grupu d’etnografía y folclore Reija . Pau y Sol del grupu "La Santina" de Rosario y del grupu "Entre Palillos y Mandiles" de la Plata respectivamente, lleven yá dellos meses acudiendo a los ensayos del grupu llangreanu. Dende’l grupu Reija sientense mui entusiasmaos cola idea de colaborar con grupos americanos y trabayar xuntos pol fomentu de la cultura asturiana. El grupu yá cuenta con integrantes chilenos, arxentinos, irlandeses, australianos ya iclusive de Tolivia.

L’actuación del sábadu taba enmarcada dientru del mercáu tradicional que tolos años faise nel pueblu mineru de La Nueva, onde pudo asistise a representaciones teatrales, música folk en direutu, bailles, venta de productos del país, etc.

Esti ye l'enllaz pa ver la noticia completa espublizada na web PlanetAstur

Escuela de Música Tradicional

La escuela de música tradicional de la Agrupación d'Etnografía y Folclor "Reija" de Llangréu ta inmersa en plenu cursu académicu 2006/2007.

Ésta escuela entamó nel añu 1995 al dase cuenta dellos componentes del Grupu Reija , que nel entornu de la agrupación y nel ambiente que se movien había una necesidá de transmitir enseñances sobre instrumentos tradicionales y sobre too no relativo a pareyes de gaita y tambor que supieran tocar pa grupos.

La escuela, nel so entamu, daba clas de curdión, gaita y tambor. Llueu añadióse pandereta, panderu cuadrau, baille, llinguaxe musical y cultura tradicional. Les clases impártense nes aules del Colexu Públicu "Eulalia Álvarez Lorenzo" que ta situau na Plaza Merediz de La Felguera, ente la Ilesia y la Biblioteca, mesmamente enfrente l'ambulatoriu. El Fechu de que les clases seyan nes instalaciones d'un colexu favorez que'l escolin tea una atención personalizada al disponer d'un aula pa él solu.

Una de les ventaxes de la escuela de música tradicional "Reija" de Llangréu ye que la propia escuela facilita l'instrumentu y el material didácticu. D'esta manera, l'escolín nun tendrá que facer un desembolsu importante de perres hasta que él lo decida, en casu de que siga afondando nel so aprendizaxe. Nun hai edá concreta pa entamar, nin por mozu nin por vieyu. La escuela adaptaráse a les posibilidaes del alumnu.

L'horariu de clases ye de 18 a 20:30 hores, los martes y xueves. Dempués del aprendizaxe individual del instrumentu, ponse en comuña lo aprendío con otros alumnos na modalidá de conxuntos musicales (pareya, bandina, etc.).

Pa más información pues pasar pol Colexu Eulalia Álvarez Lorenzo de La Felguera los martes o los xueves a partir de les 18 hores o bien llamar a los númberos de teléfonu:

985 67 54 96 - 676 69 14 24

o al corréu elletrónicu areija@teleline.es

Entamu

Esti ye'l entamu del primer blog de La Asociación d'Etnografía y Folklor Reija de Llangréu. Equi podremos dir viendo toles noticies rellacionaes col grupu, la escuela de música, la so xente, actuaciones, charres, esposiciones, viaxes, ensayos, prensa, cursos, talleres y tolo que'l grupu considere d'interés pa ser nomao y compartío con toos al traviés d'esti bloge.